Hoe is it? Mei my bêst, hear! Krekt wer in moai wykein achter de rêch. Wat ha jim dien it ôfrûne wykein? Spitich dat jim gjin antwurd jaan kinne. Eins hawwe wy no dus gjin kommunikaasje. En dat kin fansels net yn in LinKk dy’t as tema ‘Kommunikaasje’ hat. Wolst myn fraach noch wol graach beäntwurdzje? Mail dan nei linkk@cedin.nl en wa wit wat foar leuke kommunikaasje as dat opleverje sil!  

Soms moatte je goed kommunisearje kinne as je wat berikke wolle. Bygelyks asto langer game wolst as mei fan dyn heit of mem. Fan no ôf oan kinst útlizze dat kompjûterspultsjes hiel nuttich wêze kinne! Teminsten ast it artikel op side 6 en 7 lêst.

Hasto wolris in sms’ke stjoerd nei de ferkearde persoan? Dat is ek in foarm fan kommunikaasje dy’t mis giet. Soks kin fiergeande gefolgen hawwe. Hokker? Dat lêst yn it koarte ferhaal op side 12 en 13.

Fia in touchscreen kommunisearrest ek. Dat is technyske kommunikaasje. It skerm reagearret op de oanrekking fan dyn finger. Hoe’t dat wurket? Sykje it út op side 16 en 17!   

Wy kontakte!

Marrit de Schiffart

Cedin/Taalsintrum Frysk

Lês fierder>

Wat moatte wy sûnder famylje en freonen? Sûnder har soe it libben wol hiel ûngesellich wurde. It tema fan dizze LinKk is dan ek: ‘Famylje en freonen’. Oer famylje sprutsen, ik kaam lêsten in ynteressante stelling tsjin op ynternet: 

Twa slakken op ferskillende plakken yn ien tún ferskille genetysk mear fan inoar as dat wat wy ferskille fan watfoar minsk dan ek.

Dat betsjut dus dat minsken genetysk hiel bot op elkoar lykje. Miskien stamme wy dan dochs allegearre fan ien en deselde persoan ôf? En binne wy dus ien grutte famylje? As dat sa is, binne dyn freonen dus ek dyn famylje! Nuver!

Wa’t seker neiste famylje fan elkoar binne, is de trijeling Sietske, Rikus en Joukje út Kollumersweach. Op side 18 fertelle se oer har sterke bân. Ek freonen of freondinnen hawwe soms in sterke bân. Marit, Durk, Nynke en Marije ljochtsje har bysûndere freonskip ta op side 6 en 7.

Witsto noch oare leuke ûnderwerpen foar LinKk? Mail dy dan nei linkk@cedin.nl.

Freonlike en familiêre groetnis!

Marrit de Schiffart

Cedin/Taalsintrum Frysk

Lês fierder>

‘Minsken en moetings’  is it tema fan dizze earste LinKk. En minsken moetsje, dat dogge wy yn dit nûmer. Sa komst op bledside 4 yn ‘e kunde mei Sanne, sy mocht de GTST-aktrise Gigi Ravelli ynterviewe. Fierder fertelt Issa Attaie syn bysûndere ferhaal op bledside 6 en 7. Hy komt út Afghanistan en wennet yn it asylsikerssintrum yn Burgum. Op bledside 18 en 19 stelle wy dy foar oan Doke Schmidt, de nijste Fryske oanwinst fan SC Heerenveen!

Genôch leuke minsken en genôch leuke moetings dus. Nijsgjirrich wurden? Blêdzje gau fierder!Fynsto dat der noch wol wat te sleuteljen falt oan ús ûnderwerpen? Mail dyn ideeën en suggestjes dan nei linkk@cedin.nl. Wy dogge der wat mei! 

Hoi!

Marrit de Schiffart

Cedin/Taalsintrum Frysk 

Lês fierder>

Hjir fynst de pdf fan de lêste LinKk fan dit skoaljier. Net te leauwen, wat giet de tiid dochs hurd! Takom jier gjin LinKk mear foar dy, of it moat wêze datst sitten bliuwst, mar dêr geane wy fansels net fan út. Wolst LinKk takom jier net misse? Nim dan in abonnemint. Ast in mailtsje stjoerst nei linkk@cedin.nl krijst de seis nûmers foar € 15,-.

De simmerfakânsje komt hieltyd tichterby, mar it tema fan dizze LinKk is ‘Skoalle’. It koarte ferhaal op side 14 en 15 bestiet dêrom út in kompleet ‘pauzepetear’. Fierder fynst op side 16 en 17 in ynterview mei fiif learlingen fan AOC Friesland dy’t by in jonge mei it syndroom fan Down yn ‘e klasse sitte.

Nei it fuortset ûnderwiis folget foar dy fansels in beropsoplieding. Witsto noch net watst wurde wolst? Doch dan de test op side 18. Hast fragen of leuke ûnderwerpen foar LinKk? Mail dy dan nei linkk@cedin.nl.

Hoi!

Marrit de Schiffart

Cedin / Taalsintrum Frysk

Lês fierder >

Hoi LinKk lêzers,

It tema fan LinKk 5 is ‘Trends’. Trendwatchers sizze dat Facebook Search, biologysk iten en 3D televyzje ‘hip and happening’ binne yn 2011. Der binne tsjintwurdich in hiel soad minsken dy’t trends sinjalearje. Sy neame harsels dus trendwatcher. Wolst witte wat in trendwatcher docht? Lês dan it artikel op side 4. Harmen Meinsma is moadefotograaf en makke spesjaal foar dizze LinKk in moadespread. Op side 16 en 17 fynst syn foto’s en lêst alles oer de lêste moade.

En hasto wolris fan Conforce heard? Dat soe al moatte, want dit Fryske technotalint is populêr! De Fryske technoscene is yn opkomst en de muzyk is bûten de provinsje miskien noch wol bekender as binnen de provinsje. Heech tiid om yn ‘e kunde te kommen mei ien fan dy technotalinten dus. Dat kin op side 18. Hast fragen of leuke ûnderwerpen foar LinKk? Mail dy dan nei linkk@cedin.nl. Kinst LinKk ek online lêze op linkk.tv.

Ut namme fan de redaksje,

Marrit de Schiffart

Cedin / Taalsintrum Frysk

Lês fierder>

Hoi LinKk lêzers,

Linkk 4 hat as tema Bisten en Natuer. It miljeu is de lêste jierren in hieltyd weromkommend diskusjepunt. ‘Een beter milieu begint bij jezelf’, wurdt faak sein. Mar… wat kinne wy dwaan? Op side 4 fynst fiif maklik útfierbere klimaatmaatregels. Troch de klimaatferoaring sille guon bistesoarten de kommende jierren útstjerre. Teminsten, dat tinke ferskate wittenskippers. Om wat foar bisten as it dan giet, lêst op side 6 en 7.

Fraachje: bisto in bistefreon of in echte fleisiter? It makket eins neat út; beide kearen silst it artikel op side 12 en 13 wol nijsgjirrich fine. Dat artikel fertelt nammentlik it ferhaal fan in fegetariër. Hasto sels noch leuke ûnderwerpen foar LinKk? Mail dy dan nei linkk@cedin.nl.

Ut namme fan de redaksje,

Marrit de Schiffart

Cedin/Taalsintrum Frysk 

Lês fierder>

Hoi LinKk lêzers,

It tema fan dizze tredde LinKk is ‘Kommunikaasje’. En kommunisearje, dat dogge wy tsjintwurdich. It is sels sa slim dat guon minsken lêst ha fan infobesitas. Infobesiwatte?! Infobesitás. Dat is in nije sykte, dy’t foaral de jongerein treft. De tsunami oan ynformaasje dy’t wy op ús ôf krije, makket ús deadsbenaud om wat te missen. Sa benaud dat wy der siik fan wurde. Dy sykte hyt dus infobesitas. De klachten? Wurgens, slieptekoart en konsintraasjeproblemen. Ast mear fan de nije sykte witte wolst, moast gau trochblêdzje nei bledside 16. Dêr fynst in kommunikaasje-eksperimint: hoe is it om in pear dagen sûnder MSN, Hyves en mobyl te libjen?

Hasto mear as 300 freonen op Hyves of Facebook? Dan is it miskien handich om guon freonen te dumpen, want ûntfreonskipje is hip! Op bledside 4 stiet in artikel oer ûntfreonskipjen. Fierder lêst it ferhaal fan Ilse de Jong. Sy hat in spiersykte, mar giet nei in reguliere skoalle. Hoe is it foar har om mei ‘gewoane’ learlingen te kommunisearjen? It antwurd fynst op bledside 12.  

Hast fragen of leuke ûnderwerpen foar LinKk? Mail dy dan nei linkk@cedin.nl. 

Wy kontakte!

Marrit de Schiffart

Cedin / Taalsintrum Frysk

Lês fierder>

Hoi LinKk lêzers,

It tema fan dizze LinKk is ‘Famylje en Freonen’. In hearlik tema, want wa kin no sûnder famylje of freonen? Net ien dochs? Oer famylje sprutsen: doe’t ik wat oan it googeljen wie, fûn ik de famyljenammebank fan it Meertens Ynstitút. Wa’t syn achternamme dêr yntypt, sjocht hoefolle minsken yn Nederlân deselde namme hawwe. Sa ûntduts ik dat myn famylje aardich útwreide is de ôfrûne 50 jier. Yn 1947 wienen der 68 minsken mei ‘De Schiffart’ as achternamme, mar yn 2007 wienen dat der al 145. Wy binne ús aardich oan it fuortplantsjen dus! Wolst dyn achternamme ek tsjekke? Sjoch op meertens.knaw.nl/nfb.

Yn dizze LinKk lêst allerhanne artikels oer famylje en freonen. Sa wie Jason efkes wat minder bliid mei syn âlders, doe’t er hearde dat se skiede soenen. Dat it no wer goed mei him giet, lêst op side 16 en 17. Jochem en Femke komme út in wol hiel ferskillend gesin: Jochem hat gjin broerkes en suskes en Femke hat der mar leafst trettjin! Op side 12 en 13 fertelle se oer de foar- en neidielen dêrfan. Naomi is 12 jier en krijt ynkoarten noch in lyts broerke. Bysûnder dochs? Har ferhaal lêsto op side 5.

Freonlike en familiêre groetnis!

Marrit de Schiffart

Cedin / Taalsintrum Frysk

Lês fierder>

Hoi LinKk lêzers,

Goeie fakânsje hân? Lekker oan it tjirgjen west op de playa? En moaie potsjes rûn-de-tafel spile op de kemping? Spitich dat it wer foarby is. Ien treast: hjir is LinKk! LinKk is in tydskrift mei nijsgjirrige artikels en nijtsjes, dat spesjaal makke wurdt foar it fak Frysk yn de ûnderbou fan it fuortset ûnderwiis. Mar dat is net alles: LinKk is it ljocht tusken al dy tsjustere skoalboeken. Mei oare wurden: LinKk sleept jim troch dit skoaljier hinne! Hast fragen of leuke ûnderwerpen foar LinKk? Mail dy dan nei linkk@cedin.nl.

‘Minsken en Moetings’ is it tema fan dizze earste LinKk en minsken moetsje, dat dogge wy yn dit nûmer. Sa komme wy yn ‘e kunde mei de rizende stjer Anna Wolters. Sy spile fan ‘t simmer yn ‘That’s alright momma’, it iepenloftspul fan Dronryp. Fierder treffe wy in luchtballonfarder, in kitesurfer en in fuotbalster fan SC Heerenveen.

Genôch leuke minsken en genôch leuke moetings dus. Nijsgjirrich wurden? Blêdzje gau fierder!

Nice to meet you!

Marrit de Schiffart

Cedin / Taalsintrum Frysk

Lês fierder

Hoi jonges en fammen,

Ha, noch mar in pear moanne en it is fakânsje! Ha jim ek alwer sa’n sin oan sinnige dagen dêrtst op dwaan kinst watst wolst, omtst net nei skoalle hoechst? Hearlik, hearlik, hearlik! Mar safier is it noch net. Sinnige dagen binne no noch op ien hân te tellen en fan skoalle binne jim noch net ôf. Sterker noch, it tema fan dizze LinKk is sels ‘Skoalle’.

Yn dit gloednije nûmer fan LinKk komme wy yn ‘e kunde mei learlingen fan klasse 2M fan it Linde College. Sy folgje op skoalle in proefprojekt foar de nije ûnderwiisfoarm Technasium. Harold Hoekstra giet leaver hielendal net nei skoalle. Hy reparearret folle leaver fytsen by it fytseferhierbedriuw fan syn pake. En Elske DeWall? Sy is krekt klear mei skoalle en rjochtet har no op har muzykkarriêre. In karriêre dêr’t it seker goed mei komt, want dit sjongtalint giet as in spear!

Do lêst alles oer dizze en oare persoanen yn de lêste LinKk fan dit skoaljier. Skuon út, kessen ûnder de kont en lêze!

Ut namme fan de redaksje,
Marrit de Schiffart
Cedin/Taalsintrum Frysk

Lês fierder >